El términu mieloidi (mielo- + -oidi) es un adjetivu qu'en el sentíu más ampliu significa "pertenecienti a la médula ósea" o "similar a la médula ósea", y el adjetivu relacionau mielógenu (mielo- + -genu) significa "derivau de la médula ósea". En la hematopoyesis, dambus términus se refierin a células sanguíneas que s'originan d'una célula progenitora pa granulocitus, monocitus, eritrocitus, o plaquetas[1][2] (el progenitor mieloidi común o CMP) y a menú inclusu más específicamenti a la línea del mieloblastu (los mielocitus, monocitus, y los sus tipus hijus); por tantu, manqui töas las células sanguíneas, inclusu los linfocitus, nacin e la médula ósea, las células mieloidis en un sentíu específicu del términu pué distinguilsi las células linfoidis, es izil, linfocitus, los cuális vienin e células progenitoras linfoidis comunis (CLPs) que dan lugar a las células B y las células T.[2] La diferenciación d'estas células (es izil, linfopoyesis) no está completa jata que migran a los órganus linfáticus talis comu'l bazu y el timu pa programalsi por exposición a antígenus. Asín, enti los leucocitus, el términu mieloidi está asociau con el sistema inmuni innatu, en contrasti con linfoidi, que s'asocia con el sistema inmuni adaptativu. Igualmenti, mielógenu normalmenti se refieri a células sanguíneas blancas no linfocíticas,[3] y eritroidi pué usalsi a menú pa distinguil "lo relacionau con eritrocitus" y separaglu del significau pa mieloidi y linfoidi.[4] La paravra mielopoyesis tié sentíus diversus d'un modu paralelu a aquéllus de mieloidi, y mielopoyesis en el sentíu más estrictu es la formación regulá específicamenti de leucocitus mieloidis (mielocitus), permitiendu qu'el significau de mielopoyesis pué distinguilsi de eritropoyesis y linfopoyesis (inclusu manqui töas las células sanguíneas nacin en la médula).
Ai otru significau de mieloide que significa "pertenecienti a la médula espinal", pero es una hartá menus estialu. Mieloidi no debería confundilsi con mielina, refiriéndosi a una capa aislanti que cubri los axonis d'una hartá neuronas.
Los neoplasmas mieloidis siempri conciernin a la médula ósea y están relacionaus con las células hematopoyéticas.